Hapja e negociatave për hyrjen e Shqipërisë në Bashkimin Evropian, është një nga temat më të nxehta të politikës shqiptare, duke qenë se 28 qershori, data për dhënien e vendimit, po afron.
Ish-kryeministri Sali Berisha, ka publikuar 10 kushtet që Gjermania i ka vendosur Shqipërisë për hapjen e negociatave.
Ai thotë, se të dhënat janë të sakta dhe janë marrë nga burime të mirëinformuara në Bundestag.
Sipas këtij dokumenti që pritet të publikohet së shpejti, kërkohet që Shqipëria para hapjes së negociatave duhet të plotësojë 10 kushte:
1- Votimin e reformës zgjedhore
2- Vetingun e të paktën të gjithë gjykatësve dhe prokurorëve të apelit e sipër
3- Ndjekjen penale të të gjithë gjykatësve dhe prokurorëve që gjenden në shkelje të ligjeve gjatë vetingut
4- Ndjekjen penale dhe dënimin për korrupsion dhe trafiqe të zyrtarëve të lartë.
5- Zhdukjen e mbjelljes dhe prodhimit të drogës në vend.
6- Luftën me rezultate konkrete te krimit te organizuar, korrupsionit dhe trafiqeve!
7- Ngritjen dhe funksionimin e SPAK
8- Ngritjen dhe funksionimin e Gjykatës Kushtetuese dhe Gjykatës së Lartë!
9- Zbatimin e reformës zgjedhore
10- Funksionimin normal të shtetit ligjor.
“Ky eshte dekalogu i kushteve qe ka vendosur Gjermania per hapjen e negociatave me Shqiperine. Cdo njeri qe lexon kete dekalog e ka te qarte si drita e diellit se me Edvin Kristaq Ramen nuk ka integrim, nuk ka hapje negociatash por vetem kushte, dyfishim kushtesh dhe bllokim! “, shkruan ish lideri i Partisë Demokratike.
