Urbanisti i njohur Gent Kaprata u shpreh sot se qeveria Rama ka uzurpuar funksione të pushtetit vendor lidhur me menaxhimin urban, ku përfshihen kontrolli i territorit, lejet e ndërtimit etj.

Kaprata tha se Edi Rama ka bërë të kundërtën e asaj që duhej të bënte në procesin e decentralizimit.

“Shtetin shqiptar e ka bërë Ismail Qemali në 1912, sot kemi nevojë të modernizojmë shtetin dhe kjo bëhet duke përfshirë qytetarët në vendimmarrje dhe jo duke centralizuar pushtetin, duke bërë shtet policor”, tha Kaprata.

Ai akuzoi Kryeministrin se nuk merret me çështje të infrastrukturës urbane kombëtare, por merret me sheshet që i takojnë pushtetit vendor.

“Ka 5 vjet që nuk bëhet asnjë investim në infrastrukturën kombëtare, mungojnë projektet konkrete ndaj dhe ne nuk përfitojmë nga fondet, sikundër ndodhti nga Samiti i Triestes, ku qeveritarët tanë shkuan me duar në xhepa”, tha Kaprata. Sipas tij, Rama ka hequr dorë nga qeverisja qendrore dhe ka uzurpuar kompetencat e kryebashkiakëve, ndërsa ministrat janë kthyer në drejtorë.

Kaprata tha se e njëjta gjë ka ndodhur edhe me Kryebashkiakët, që janë kthyer në drejtorë të bindur ose jo shumë të bindur./syri.net