Kreu i grupit parlamentar të Lëvizjes Socialiste për Integrim, Petrit Vasili, foli për rekomandimin pozitiv të Shqipërisë, seancën e sotme parlamentare dhe rishfaqjen e Tahirit në Kuvend.

Vasili akuzoi sërish kryeministrin Edi Rama për papërgjegjshmëri.

“Në sallën e Kuvendit mungonte kryeministri i vendit. Është tragji-komike. Një kryeministër që predikon mirëkuptim, ka një papërgjegjshmëri, një ditë pasi  Mogherini vjen nga Brukseli në Tiranë, ky nuk vjen dot nga kryeministria në parlament.

Rama nuk bashkëjeton dot me debatin, me demokracinë e debatit. I pëlqente debati kur ishte në opozitë,” tha Vasili

Ndërsa për çështjen Tahiri, kreu i grupit të LSI u shpreh se skepticizmi europian vjen pikërisht nga kjo çështje dhe tha se është përcaktuese për të ardhmen e vendit.

“Kjo është një çështje mes tyre por që dënon shqiptarët. Rezervat dhe skepticizmi europian që lë dyshime për vendimet e qershorit. Është lidhur me këtë çështje e konkretisht kjo e Tahirit, që diskutohet nga Perëndimorët. Është përcaktues për vendimin e ardhshëm.

Seanca e sotme kishte qëndrimin që meritonte. Ne respektuam shqiptarët, Mediu, Basha e Kryemadhi dhanë mendimin e tyre. Sallën e përbuzi kryeministri. Përbuzi dhe të tijët duke mos qenë. Nuk mund t’i bënim fresk mazhorancës që i poshtëron kryetari i tyre. Kanë durim ata. Sot vinim 24 orë pas ngjarjeve të mëdha dhe ai nuk vjen.

Sot Shqipëria në kohën kur kryeministri i bën jehonë drejtësisë, sot s’kemi drejtësi vetëm për një shkak të veprimit të qeverisë së tij. Sistemi gjyqësor është i asfiksuar,” tha Vasili në studion e emisionit “Opininion” në news 24.