Partia Demokratike denoncoi praninë e personave të paautorizuar në qendrat e votimit, në zgjedhjet e pjesshme që po zhvillohen në Kukës.
Shefi i Shtabit, të kandidatit të Koalicionit Bashkë Fitojmë, Ardian Elezi, denoncoi me foto, drejtorë të Partisë socialiste në Kukës, duke I akuzuar se po intimidojnë votuesit.
Me video dhe foto, ‘BF’ ka nxjerrë pamjet e personave që sipas tyre pyesin dhe mbajnë shënim të gjithë emrat e atyre që votojnë, ndërsa theksojnë se ata nuk janë të autorizuar që të qëndrojnë pranë qendrave të votimit.
‘Patronazhistët e Rilindjes sot janë në kye të detyrës, edhe pse në kundërshtim me ligjin. Drejtorë shkollash, Hipotekës, apo dhe institucioneve të tjera, janë në krye të detyrës , për të devijuar dhe kontrolluar votat. Ata janë fotografuar në qendërat e votimit. KQZ e thotë qartë se nuk lejohen me kodin zgjedhor brenda ambienteve të qendrave të votimit. Ne do t’i paraqesim në OSBE-OHDIR faktet dhe provat, dhe në prokurori të gjitha këto raste të patronazhistëve. Pa zgjedhje të lira, nuk ka zgjedhje.’, thanë në një deklaratë për mediat, përfaqësues të koalicionit ‘Bashkë Fitojmë’. Ndërkohë, fotot e atyre që nga koalicioni akuzohen si patronazhistë janë bërë në kopshtin nr. 1 dhe në Shkollën ‘1 Qershori’.
