Kreu i demokratëve Lulzim Basha, duke komentuar shkarkimin e prokurorit që po hetonte Sajmir Tahirin tha se qeverisja u kap sot nga krimi dhe Drejtësia nga Edi Rama. Ai akuzoi se me emërimet e sotme të Arta Markut e gjithë prokuroria u vendos në dorën e Ramës. Ky veprim, tha kryedemokrati, i vendos shqiptarët në mëshirën e krimit. “Sot shqiptarët e  kanë edhe më të qartë se kryeprokuror dhe kryegjyqtar është Rama. Të tjerët janë vegla të bindura të Ramës. Prandaj dhe vendimi i sotëm  është një fitore për krimin e organizuar mbi drejtësinë. Qeverisja sot është e kapur nga krimi, prokuroria është në shërbim të interesave kriminale. Liria dhe Demokracia sot janë në mëshirën e krimit. Ky është lajmi më i zi. Reforma në drejtësi ka renë, krimi ka triumfuar mbi shtetin e të drejtës” tha Basha.

PD e denoncoi që në nëntor të 2017-s se emërimi pa vetting dhe në shkelje të Kushtetutës i Arta Markut u bë për të futur nën kontroll prokurorinë dhe dosjet që prekin mazhorancën.