Edhe pse Europa e ka vënë në qendër të kritikave, duket se presidenti i Turqisë, Erdogan ka mjaft miq në Ballkan.

Njihet tashmë miqësia që ka ai me kryeministrin Edi Rama, por kohët e fundit një marrëdhënie e ngushtë ka nisur edhe me Presidentin e Serbisë, Vuçiç.

Në 557-vjetorin e themelimit, qyteti i Novi Pazarit (Pazari i Ri) në Serbi e ka nderuar Presidentin turk me titullin “Qytetar Nderi”

Nderimi me këtë titull është miratuar nga këshilli bashkiak i këtij qyteti që e ka votuar atë ditën e premte.

“Investimet e shumta, projektet në infrastrukturë dhe ekonomi dhe përpjekjet për të ruajtur kulturën dhe trashëgiminë historike të rajonit të Sanxhakut, janë disa nga arsyet e këtij gjesti simbolik”, deklaroi kryebashkiaku i qytetit, Nihat Bisevac.Novi Pazari është kryeqendra e rajonit të Sanxhakut, që ndahet mes Serbisë dhe Malit të Zi e ku pjesa më e madhe e popullsisë janë myslimanë. Pjesën e tyre të këtij rajoni, serbët e njohin me emrin Rashka.