Kryeredaktori i të përditshmes MAPO, Arion Sulo, i ftuar në studion e Fax News për të folur mbi çeljen e pritshme të negociatave për anëtarësim të Shqipërisë në BE ka thënë se ky vendim është i pritshëm dhe më tepër se përmbushje e standardeve, siç u shpreh është dëshirë e mirë e  Bashkimit Evropian.

“Nuk është se rekomandimi pozitiv do të thotë se qeveria i ka bërë pozitivisht detyrat, i ka përmbushur pozitivisht detyrat e shtëpisë të lëna nga Bashkimi Evropian, apo Reformat.

Gjithsesi ky vendim shumë pozitiv ka të bëjë me fokusin e Bashkimit Evropian e të Brukselit në proceset integruese të Ballkanit Perëndimor. Është dashamirësia e tyre dhe jo  ndonjë arritje e madhe e qeverive tona.

Europianët kanë probleme me Brexit, kanë probleme me Trump dhe kanë probleme së fundmi me Rusinë.

Çështjes së Shqipërisë në BE ata duan t’i japin zgjidhje politike. Po skrupoloziteti i tyre nuk i lejon që të lejojnë një hyrje në bllok dhe duke u bazuar vetëm tek Reforma në Drejtësi që është vetëm një vepër e tyre dhe e Shteteve të Bashkuara të Amerikës, ata japin këtë mesazh pozitiv, por sigurisht edhe me kushtet e tjera.

E theksojnë vetë në dokumentin e tyre, pra në raportin që është bërë publik, e jo vetëm për Shqipërinë por për të gjashta vendet, se çdo raport i KE për vendet e Ballkanit nuk do të ndryshojë zhvillimet e këtyre vendeve për demokracinë, korrupsionin dhe të drejtat e njeriut, pra për gjendjen ku jetojnë.

Sigurisht që kjo çelje negociatash duhet të kishte ardhur disa vite më parë.

Të jemi të sinqertë, ne nuk mund t’ua hedhim evropianëve për standarded. Ne sot kemi ministrin e Brendshëm që thotë që do t’u nximë jetën bandave. Bandave nuk u nxihet jeta, por arrestohen.

Prandaj çelja e negociatave varet vetëm nga ecuria e Reformës në Drejtësi që nuk është vepër shqiptare por është meritë e tyre.” – tha Arion Sulo.