Qendra për të Drejtat në Punë, CLR.AL, ka shprehur shqetësimin e saj në lidhje me situatën e krijuar në minierat shqiptare. Qendra përmend rastet e vdekjes së dy minatorëve, që tragjikisht humbën jetën në galeritë e “vdekjes”, por edhe rastin e një personi që ra nga pallati kur ishte duke punuar.

Qendra për të drejtat në Punë i bën thirrje organeve ligjzbatuese të ndërhyjnë sa më parë për të ndalur tragjeditë e radhës.

"Informaliteti është ende një problem për ekonominë shqiptare, ndaj i takon institucioneve përkatëse të kryejnë inspektime të vazhdueshme për të vënë para ligjit të gjithë ata subjekte të biznesit të cilët duhet të sigurojnë punonjësit e tyre si dhe tu garantojnë atyre kushte teknike duke shmangur në këtë formë aksidentet në punë. CLR.AL vëren me shqetësim dhe situatën në miniera ku vijojnë të humbin jetë njerëzish.

E ndërsa shoqëria civile dhe sindikalistët ende nuk kanë rënë dakord për miratimin e një drafti ligjor të Statusit të Minatorit, minatorët kërkojnë me të drejtë që ky debat të përfundojë sa më parë me miratimin e statusit aq të shumëpritur ndër vite", thuhet në reagim.

Qendra për të drejtat në Punë, kërkon nga ministria e linjës të nxisë bashkëpunimin mes palëve për të përfunduar sa më parë hartimin e draftit e miratimin e tij nga kuvendi, si një detyrim për kategorinë e profesioneve më të vështira siç janë minatorët.