Ndryshe nga regjimi komunist, regjimi fashist dënoi fare pak persona me vdekje për arsye politike. Nuk bëhen as 10 të tillë për 4 vite. Në listën e vogël futet edhe ekzekutimi me vdekje i komunistëve të sipërthënë, të cilët u arrestuan në Fier dhe u sollën në Tiranë. Për ta nuk ka asnjë rresht në librin me dokumente që botoi në vitin 1986 Drejtoria e Përgjithshme e Arkivave të Shtetit, ndonëse në fondin përkatës janë dokumentet e dënimit. Ndërsa në librin “Yje të pashuar”, botim i vitit 1971, në faqet 32-35 është vetëm një përshkrim letrar për jetët e tyre, por asnjë referim nga dokumentet. Të tre ishin të vitlindjes 1917. Nikolla nga Korça, Feriti nga Dibra dhe Hamdiu nga Tirana.

Gjykata Ushtarake e Fuqive të Artmatosura, me vendimin e datës 30.4.1942, i deklaroi fajtorë në bazë nenit 9 të dekretit nr.22, datë 2.6.1939 “Mbi konfiskimin e pasurive” dhe nenit 1 të dekretit mëkëmbësor nr.45, datë 6.4.1942 “Rreptësimi i dënimit për mbajtje armësh pa leje”. Në këtë të fundit thuhej: Cilido qi, pa pasun leje, gjindet me armë zjarmi ose mjete plasëse përjashta banesës ndër qytete me 4000 banorë e .sipër, dënohet me burgim të randë prej 5 e deri 20 vjet dhe në qoftë se ka rrethana randuese mund të zbatohet kundra tij edhe dënimi me vdekje”.

Dekretet u botuan në "Fletorja zyrtare" në mënyrë individuale.