Nga Sarah Smith, BBC

Me vetëm 50 ditë të mbetura në detyrë, dhe pasi kaloi fundjavën e Falënderimeve me djalin e tij, presidenti Joe Biden njoftoi se po fshinte dënimet federale të Hunter Biden, duke i kursyer atij çdo dënim të mundshëm me burg, pavarësisht se kishte këmbëngulur më parë se nuk do të ndërhynte në procesin gjyqësor dhe se nuk do të përdorte kompetencat presidenciale në një mënyrë të tillë.

Në një deklaratë, Joe Biden tha se ai po e bënte këtë tani sepse ai besonte se akuzat ishin "të motivuara politikisht".

Presidenti po akuzohet për hipokrizi nga kundërshtarët e tij politikë, por ai argumentoi se "asnjë person i arsyeshëm", që shikonte faktet, nuk mund të arrinte ndonjë përfundim tjetër përveçse Hunter Biden u godit vetëm sepse ishte djali i tij.

Ai tha se kushdo tjetër që ka kryer këto vepra, relativisht të lehta, nuk do të ishte ndjekur penalisht.

Hunter Biden u përgjigj duke thënë se gabimet e tij ishin shfrytëzuar për ta poshtëruar dhe turpëruar publikisht atë dhe familjen e tij, dhe ai u zotua të mos e merrte kurrë faljen që i ishte dhënë, si e mirëqenë.

Donald Trump postoi në mediat sociale se ai mendon se falja është një "abuzim dhe shpërdorim i drejtësisë".