Sulmet kundër gazetarëve në Afganistan acaruan Komunitetin ndërkombëtar thuhet nga OKB-ja.

Të paktën 37 persona, mes të cilëve një fotograf i AFP-së dhe nëntë gazetarë të tjerë, kanë humbur jetën në Afganistan pas një sërë atentatesh të përgjakshme në Kabul dhe në jug.

Atentati i dyfishtë kamikaz, marrë përsipër nga grupi xhihadist i Shtetit Islamik goditi dje kryeqytetin duke shkaktuar të paktën 25 të vdekur, mes të cilëve dhe kryefotoreporteri i AFP-së në Kabul, Shah Marai, 41 vjeç.

Tetë gazetarë të tjerë janë vrarë gjithashtu në momentin e shpërthimit të dytë të ndodhur mes reporterëve.

“Pas atentatit të parë kundër selisë së shërbimeve sekrete afgane, një kamikaz i dytë hodhi veten në erë mes gazetarëve, të cilët kishin mbërritur për të mbuluar sulmin”, sipas policisë.

Sipas Reporterëve pa Kufi, bëhet fjalë për atentatin më të përgjakshëm kundër medias që prej rrëzimit të talebanëve në vitin 2001.

Sekretari i përgjithshëm i Kombeve të Bashkuara, Antonio Guterres shprehu indinjatën e tij pas atentatit të dyfishtë, që shkaktoi gjithashtu edhe 49 të plagosur, shkruan Atsh.

“Në një sulm të tretë, 11 fëmijë u vranë dhe 16 persona u plagosën, mes të cilëve ushtarë rumunë dhe afganë, kur një kamikaz hodhi në erë automjetin e tij kundër një autokolone të NATO-s në provincën e Kandaharit.

“Është normale për njerëz që nuk mund të fitojnë me votë, atëherë ata përdorin bomba”, theksoi sekretari amerikan i Mbrojtjes, Jim Mattis duke iu referuar zgjedhjeve legjislative që do të zhvillohen në muajin tetor në Afganistan.

Sekretari amerikan i Shtetit, Mike Pompeo i dënoi ashpër këto sulme barbare.