Janë zbardhur emrat e dy shqiptarëve të arrestuar këtë të hënë në Itali, gjatë operacionit të koduar “Bogota”. Sipas raportimeve të mediave italiane, në pranga janë vënë Ervin Luja dhe Majius Muca, përkatësit 38 dhe 29 vjeç.

Policia italiane ka goditur një organizatë kriminale të trafikut ndërkombëtar të drogës përmes Adriatikut. Gjatë aksionit policor në Brindizi, katër persona u arrestuan si pjesë e një rrjeti të gjerë të drogës. Dy prej tyre janë shqiptarë dhe dy italianë.

Mediat italiane tregojnë se 51 persona akuzohen nga Prokuroria si të përfshirë në këtë organizatë kriminale.

Disa prej tyre janë arrestuar kohë më parë gjatë operacioneve të ndryshme. Grupi kriminal trafikonte hashash, kokainë dhe heroinë. Organizata ishte e ndarë në disa grupe njerëzish, të cilët kanë role të përcaktuara. Ata kanë kontrollin e tregut në Lombardi, Emilia Romagna, Toscana, Sardenja, Basilicata, madje dhe në Belgjikë, ku blinin sasi të mëdha kokaine dhe më pas i shpërndanin në qytetet italiane.