Në Obot, fshati më i përmbytur i Shkodrës, i Anës së Malit, uji është larguar. Por ajo që ka mbetur pas është më shumë se një dramë. Sipërfaqe të tëra toke kanë dalë jashtë përdorimit. Nga fusha pjellore, tashmë ato janë kthyer në moçalishte.

Ajo ç’ka ka mbetur është një kënetë, nga një fushë pjellore në një tokë e zhytur në baltë. Banorët po tentojnë të kryejnë ato pak punime që bëhen. Por arat duket se nuk do të japin më prodhime.

Deri tani nuk ka vlerësime dëmesh. Megjithëse këtu në Obot çdo gjë është shkatërruar. Për administratorin e Njësisë Administrative të Anës së Malit, Arben Ceni, gjendja është e rëndë. Zona përveç të tjerash ka nevojë për t’u dezinfektuar.

Aktualisht në shumë sipërfaqe të tokave ka ende prezencë uji. Për 30 ditë Nënshkodra, mbi 5 mijë hektarë, ishte në pushtetin e ujit. Lëvizja bëhej me varka, kurse fëmijët shkuan në shkolla me raste. Banorët e këtueshëm ende nuk kanë vendosur çfarë do të bëjnë: të ikin apo t’i nënshtrohen së keqes!