Një aksion policor në Itali ka goditur një bandë që merrej me trafik droge. Siç raporton “La Repubblica”, 14 persona u arrestuan: 9 nga Afrika, katër shqiptarë dhe një italian.

Hetimi që çoi në realizimin e operacionit policor të koduar “Tabula” ka zgjatur 15 muaj, kohë gjatë së cilës janë sekuestruar rreth 23 kilogramë drogë. Gjithashtu janë sekuestruar edhe 615 mijë euro cash.

Grupi shiste kryesisht heroine, por edhe kokainë e hashash. Dyshohet se nga ky aktivitet grupi me rreth 120 klientë, ka gjeneruar rreth 1.5 milionë euro në rreth 1 vit.

Heroina blihej nga shqiptarët dhe shpërndahej në veçanti nga tunizianët; kokaina blihej po nga shqiptarët së bashku me italianin.

Ky i fundit ka një aktivitet tregtar në Parma, ku efektivët sekuestruan rreth 50 mijë euro, që dyshohet se janë përfituar nga trafiku i drogës.