Bilanc tragjik i dëmtimit të pishave në Kodër Krastë. Janë, jo pak, por 1700 rrënjë pisha të dëmtuara si pasojë e stuhive të shiut që përfshinë Elbasanin gjatë muajit qershor.

Fakti konfirmohet nga drejtori i shërbimit pyjor në Bashkinë e Elbasanit,  Shpëtim Çullhaj. Ai shprehet se nga verifikimet e kryera nga shërbimi pyjor rezulton se janë dëmtuar rreth 1700 rrënjë me pisha.

Z. Çullhaj shton se pishat e dëmtuara do të zëvendësohen me fidanë të rinj në kohën kur është periudha e pyllëzimit, ndërsa drutë e grumbulluara do të përdoren për nevojat e bashkisë Elbasan.

Krasta mbetet mushkëria e qytetit të Elbasanit, ndaj shpresojmë që ky premtim i pushtetit lokal të mbahet dhe pishat e shkulura të zëvendësohen së shpejti.