Shumë njerëz mendojnë se të gjitha mbetjet plastike përfundojnë në vendepozitime apo në rastin më të keq në oqeane, por një qytet europian po i përdor ato për të ndërtuar një park lundrues.

Parku i Ricikluar ndodhet në Roterdam, Holandë, i ndërtuar tërësisht nga plastika e ricikluar e mbledhur nga i njëjti lumë që tani po lundron. Jo vetëm që është një hapësirë ​​unike për komunitetin, por po ashtu shërben për të ulur ndotjen nga plastika.

Parku është ndërtuar nga seksione modulare gjashtëkëndore, çka nënkupton se mund të zgjerohet pasi materiali i përdorur mund të mblidhet. Parku është projektuar gjithashtu si një habitat për kafshë të egra si dhe gjallesa të tilla si kërmijtë, krimbat, larvat, brumbujt dhe peshqit.

Fondacioni Recycled Island dhe 25 partnerë të tjerë përfunduan ndërtimin e Parkut të Ricikluar, duke vendosur pengesa përgjatë lumit Meuse për të mbledhur fillimisht mbetjet plastike dhe për t’i transformuar më pas në 28 blloqe gjashtëkëndore.

Parku i Ricikluar nuk është projekti i vetëm në të gjithë botën ku njerëzit po marrin parasysh ndikimin mjedisor të ndotjes në zonën e tyre lokale. Shumë individë dhe komunitete në mbarë botën po kërkojnë të gjejnë mënyra krijuese për ripërdorimin e plastikës në mënyra që nxjerrin në pah problemin e ndotjes plastike.