Bizneset e mëdha që kanë të punësuar më shumë 250 punonjës përbejnë vetëm 0.1 për qind të totalit të bizneseve, sipas të dhënave e një vrojtimit të bërë nga Banka Botërore të publikuar së fundmi, që i referohen vitit 2016.

Vrojtimi numëroi gjithsej 108 mijë e 526 ndërmarrje aktive, nga të cilat sipas klasifikimit të Bankës Botërore, 102 mijë e 965 ndërmarrje ishin mikro duke zënë 94.9 për qind të totalit, biznese të vogla u numëruan 4413  ose 4 për qind e totalit, biznese te mesme ishin vetëm 996 subjekte, te cilat zunë vetëm 0.9% të totalit, teksa biznese të mëdha ishin vetëm 152 subjekte ose 0.1 % e totalit.

Siç shihet ekonomia e vendit është e bazuar tek ndërmarrjet e vogla dhe të mesme, por më së shumti tek mikrondërmarrjet.

Në vitin 2016, sipas të dhënave kombëtare, 99.9 për qind e ndërmarrjeve aktive ishin MSME me 2016 të cilat punësuan 81 për qind të numrit të përgjithshëm. Numri më të made të këtyre subjekteve e zotërojnë tregtia (41.5%) dhe shërbimet (20 për qind).

67 për qind e vlerës së shtuar është realizuar nga SME-të. Përqindja më e lartë e vlerës së shtuar nga mikro-ndërmarrjet erdhi nga sektori i shërbimeve, strehimit dhe ushqimit. Sektori i tregtisë ka përqindjen më të lartë që dominohet nga bizneset e vogla, ndërsa ndërmarrjet e mesme operojnë më së shumti në sektorin e industrisë përpunuese.

Banka Botërore analizon se sektorët e ekonomisë të dominuar nga SME karakterizohen nga nivele të larta të informalitetit. Shumë MSME-të në Shqipëri veprojnë në baza joformale.

Pavarësisht përmirësimeve të bëra kohët e fundit në luftën ndaj informalitetit, bizneset edhe pse janë regjistruar nuk deklarojnë xhiro dhe punonjës dhe vijojnë të kryejnë transaksione në cash masivisht.

Bizneset e paformalizuara në përgjithësi kanë produktivitet më të ulët se bizneset formale dhe u mungon mbrojtja sociale, sidomos sigurimet për punonjësit.