Presidenti i Bankës Qendrore Europiane, Mario Draghi, deklaroi se inflacioni do të rritet më shpejt drejt objektivit, deri në fund të këtij viti. Gjithashtu, Banka Qendrore Europiane nuk ndryshoi normat e interesit dhe njoftoi se programi i stimujve do të mbyllet sipas parashikimeve. Duke folur në konferencën për mediat pas përfundimit të takimit të Këshillit Drejtues të BQE, Draghi tha se inflacioni do të vijojë tendencën në rritje deri në fund të këtij viti.

“Ndërkohë që treguesit e tërthortë të inflacionit janë përmirësuar, ne mendojmë se tendenca e këtij treguesi do të vijojë të jetë në rritje në terma afatmesëm. Forca e ekonomisë vijon të mbështesë besimin tonë se konvergjenca e qendrueshme e inflacionit do të vazhdojë, pavarësisht se programi i blerjes së bonove po mbyllet”.

Përsa i përket Italisë, Draghi tha se nuk mund të parashikonte se sa do të rritej kostoja e huamarrjes së këtij vendi, por shpreson që Roma dhe Brukseli të arrijnë një marrëveshje mbi buxhetin e vitit të ardhshëm.

“Këto obligacione janë pjesë e portofoleve të bankave, është tregu që vendos. Por, besoj se një marrëveshje do të arrihet mes Italisë dhe Komisionit Europian. Për të ndihmuar bankat e tyrë, politikanët në Itali duhet të zbusin tonin dhe të mos venë në pikëpyetje kuadrin kushtetues të euros”.

Në përfundim të takimit, BQE mbajti të pandryshuar normën bazë të interesit në 0% dhe interesin për depozitat bankare në -0.4%.