Mesohet se forcat e Ndërhyrjes së Shpejtë kanë mësyrë sot me kontrolle në qytetin e Elbasanit dhe kanë rrethuar disa banesa në lagjen "Emin Matraxhiu" ku banojnëshumë familje të fisit Çapja. Tre persona nga fisi Çapja janë arrestuar, nga fisi që deri më sot numëron së paku 9 viktima nga përplasjet midis bandave. Shumë persona janë shoqëruar në Policia. Nga kontrolli janë kapur shumë armë dhe municione. Operacioni drejtohet nga Drejtori i Policisë së Elbasanit, Altin Qato dhe është në vijim. Sipas burimeve, operacioni synon goditjen e disa bandave kriminale. Të tjera arrestime priten.

Nga të dhënat paraprake mësohet se në një banesë policia ka gjetur një minë me telekomandë dhe një pistoletë. Dje Elbasani u trondit nga një shpërthim me tritol, ku shënjestër ishte një lokal në lagjen ‘Partizani’ ku për pasojë mbeti i plagosur pronari i biznesit. Vetëm dy ditë më parë Sandër Lleshaj, ministri i Brendshëm dekretuar një ditë më parë nga presidenti Ilir Meta, zhvilloi një takim me drejtuesit e Drejtorisë Vendore të Policisë Elbasan. Lleshaj u informua mbi situatën e rendit dhe sigurisë publike, ndërsa kërkoi performancë nga ana e trupës policore dhe goditje të shpejtë të grupeve kriminale. Kujtojmë se Elbasani është përmendur si qyteti i ‘listës se zezë’ për shkak të kriminalitetit.