Banka Botërore nuk do të lëvrojë kredinë prej 12 milion euro për sigurinë në diga, deri në momentin e miratimit të një fondi shtesë që do të mbulojë të gjithë investimin.

Për këtë arsye, qeveria shqiptare ka planifikuar që fondet e kursyera nga huaja prej 12.7 milion euro e Bankës Evropiane për Rindërtimin dhe Zhvillim për sigurinë në diga të ripërdoren për këtë qëllim.
Nga marrëveshja mes BERZH dhe qeverisë shqiptare kanë mbetur pa u përdorur rreth 6.1 milion euro, ndërkohë që Komisioni parlamentar i Ligjeve miratoi marrëveshjen ndryshuese, duke i hapur rrugën dhe disbursimit të kredisë së Bankës Botërore, që duhet të kishte nisur që në fillim të muajit nëntor.