Shqiptarët e paguajnë naftën më shtrenjtë krahasuar kjo me shumë vende të zhvilluara në Europë. Ndikim të ndjeshëm në çmim  kanë taksat, të cilat e zënë një kosto prej 110-120 lekë për litër. E megjithatë qeveria nuk ka parashikuar të ndryshojë asgjë të paktën edhe për 2019. Madje edhe pse paguhet taksa e qarkullimit, mazhoranca propozon vazhdimin e koncesioneve, duke e kthyer kalimin në rrugë me pagesë. 

Rreth 110 lekë në një litër naftë nga 183 lekë që tregtohet në Shqipëri janë taksa.

Kjo por edhe efekti domino në sjelljen e kompanive të tregtimit me shumicë ka bërë që shqiptarët të kenë naftën më të shtrenjë midis 20 vendeve në Europë. 

Shqiptarët paguajnë më shumë se i gjithë rajoni taksa për karburantin.

Peshën kryesore e zë akciza me 37 lekë për litër dhe taksa e qarkullimit me 27 lekë për litër, e vendosur kjo për vitit 2011.

Në atë kohë u theksua se masa është marrë për të përballuar shpenzimet e larta të mirëmbajtjes së rrugëve. 

Pavarësisht kësaj, qeveria Rama ndërmori koncesionin e parë duke vendosur tarifë kalimi në Rrugën e Kombit, ku çdo automjet i vogël paguan 5 euro.

Por dhe në vitin e ardhshëm qeveria parashikon të tjera rrugë që do të kalojnë me pagesë.

Ndërsa nuk parashikon të ndryshojë taksat për karburantin. Në këtë mënyrë drejtuesit e mjeteve në vend paguajnë njëkohësisht dy taksa, edhe taksën e qarkullimit dhe tarifën për të kaluar në rrugë. 

Ndërkohë në rajon dhe më saktë në Maqedoni konstatohet se taksat që aplikohen për një litër naftë janë vetëm dy TVSH dhe akcizë dhe pesha fiskale është dyfish më e ulët se në Shqipëri.

Por përtej kësaj, ajo që vihet re në Shqipëri e që nuk paguhen në asnjë vend të botës, janë taksa e qarkullimit dhe ajo e skanimit dhe markimit.