Sot, në ditën e tyre të 16 të revoltës, studentët kanë vendosur të zhvendosin protestën e tyre për herë të katërt brenda këtyre dy javëve. Sot ata do të grumbullohen përpara Korpusit qendror, aty ku siç shprehen në njoftimet e shpërndara në rrjetet sociale, gjenden fajtorët e situatës së tyre: rektorët.

Në njoftim thuhet: “Korpusi është godina e parë qeveritare e ngritur, pra përfaqëson Universitetin e Tiranës, nga i cili dolën të gjithë universitetet e tjerë. Dhjetori i dytë vazhdon.

Për t’i vënë të gjithë fajtorët me shpatulla pas murit, rektorët, dhe për të treguar që jemi të gjithë bashkë, studentët pa ngjyrime politike, në ora 10:00 tek Korpusi qendror.

T’i tregojmë politikës se jemi më të zgjuar se ajo, se nuk kanë rëndësi numrat, por kauza. Kauza jonë është e drejtë, kërkesat tona duhet të plotësohen patjetër. Aty duhet të jemi të gjithë më të bashkuar se kurrë për të çuar zërin tonë në vendin e të gjithë fajtorëve.”

Studentët e zhvendosën fillimisht protestën e tyre nga Fakulteti i Inxhinierisë së Ndërtimit në Tiranë përpara Ministrisë së Arsimit.

Ditë më pas ata protestuan përpara Parlamentit për t’u zhvendosur tek Kryeministria.

Pasi protestuan disa ditë përpara Kryeministrisë, ata bllokuan simbolikisht kryqëzimin e Zogut të Zi dhe disa kryqëzime të tjera, duke u kërkuar ndjesë qytetarëve për shqetësimin.

Sot, studentët, do të grumbullohen në një pikë të re: tek Korpusi qendror.