3500 ishte numri i kërkesave për azil në Republikën e Irlandës, për vitin 2017-të. Së bashku me sirianët dhe gjeorgjianët, shqiptarët ndodhen sërish në krye të listës.
Me 383 kërkesa për azil, shqiptarët janë të vetmit nga Europa në këto shifra të larta që kërkojnë azil në Irlandë. Përpara nesh renditen shtetasit e Gjeorgjisë me 409 kërkesa dhe në vend të parë janë sirianët me 449 kërkesa.
Zibambve dhe Pakistani, të cilat renditen pas Shqipërisë, janë dy shtetet e tjera nga ku vijnë më shumë azilkërkuesit.
Shqiptarët renditen në krye të listës edhe sa i përket refuzimeve nga autoritetet irlandeze për të hyrë këtë shtet. Përgjatë vitit të kaluar, 487 shqiptarëve u është refuzuar hyrja në Irlandë, ndërkohë që shifra duhet të jetë më e madhe për shkak se autoritetet kanë raportuar të dhënat vetëm nga aeroporti i Dublinit.
