Makinat me xhama të zinj herë pas here kanë qenë objekt i aksioneve të Policisë, të konsideruara si problematike, kryesisht për personat në kërkim, apo me precedentë penalë. Kjo ka qenë arsyeja që thuajse çdo vit, Policia Rrugore ka vënë në zbatim plane masash, që synonin automjetet me xhama të errësuar, që në shumë raste jo vetëm janë ndëshkuar me masa administrative, por edhe janë bllokuar. Bllokimi në shumicën e rasteve është kryer për t’u dhënë kohë organeve kompetente, që të provojnë nëse mjetet janë prodhuar me xhama të tillë, apo janë errësuar në servise. Paralajmërimi për një aksion që pritet të nisë nga e hëna, është dhënë së fundmi nga Drejtoria e Përgjithshme e Shërbimeve të Transportit Rrugor. Sipas kësaj Drejtorie, nga data 7 janar do u ndalohet çdo shërbim automjeteve që kanë errësuar xhamin e përparmë dhe xhamat e parë anësorë. Madje, në njoftimin e Drejtorisë së Transportit Rrugor, saktësohet se nuk do të “falet” askush, as shefat, as VIP-at, as “të fortët”.