Prej disa orësh forca të shumta po mbajnë të rrethuar zonën e “Astirit” ku edhe prej 136 ditësh banorët po protestojnë kundër vendimit që i shkatërron banesat dhe i nxjerr në rrugë. Ky akt aspak i pazakontë, duke patur parasysh që edhe protestat kanë qenë të qeta, po tremb burra gra e fëmijë të cilët ndryshe nga ditët e tjera nuk po largohen nga vendi i protestës edhe pse e deklaruan të mbyllur. 

Ministri Sandër Lleshaj ka urdhëruar prej disa ditësh që ti mbajë nën presion këta banorë, ku synon zmbrapsjen e tyre dhe tërheqjen nga bashkimi me protestat e opozitës para Parlamentit.
Banorët duke parë që policia vijon ti mbajë të rrethuar, i bën thirrje ambasadave që të kenë një reagim.
“Jemi të rrethuar nga policia. Jemi nën trysni dhe terror policor . U kërkojmë ambasadave që të reagojnë. Ne nuk do të largohemi dersa të largohet policia” shprehen banorët.

"Përsërisim thirrjen për ambasadën amerikane, na kanë rrethuar sikur të ishim në Jeruzalem. Ministër Lleshaj largoi policët. Tërhiq policinë dhe na lër të shkojmë në shtëpitë tona. Edhe ambasadës gjermane, britanike asaj të BE-së të shikojnë se si vijnë të ushtrojnë presion ndaj banorëve të “Unazës” tha një tjetër banor i cili po qendron me fëmijët e mitur i rrethuar nga policia.