Greqia të martën zhvilloi fluturimin e parë mbi Maqedoninë e Veriut, në një mision që u krye nga një F-16 nga 110 Combat Wing i Forcave Ajrore Hellenike “Tactical Air”, me seli në Larisa.

Qëllimi i misionit ishte gjetja e çdo sektori bosh të radarëve dhe testimi i përputhshmërisë së sistemeve të zbulimit, shkruan gazeta greke “Ekathimerini”. Misioni i së martës ishte një fluturim testimi dhe do të pasohet nga më shumë gjatë muajve të ardhshëm.

Mbikëqyrja e hapësirës ajrore të Maqedonisë Veriore ishte pjesë e marrëveshjes së emrit të nënshkruar midis Athinës dhe Shkupit verën e kaluar dhe ka qenë pjesë e politikës së NATO-s për 12 vitet e fundit. Greqia tashmë kryen mbikëqyrje mbi Malin e Zi dhe Shqipërinë.