Ish-Presidentë dhe Kryeministra të vendeve të Rajonit kanë hedhur poshtë idenë e mbështetur nga Aleksandar Vuçiç, Hashim Thaçi dhe Edi Rama për korrigjim të kufijve.

Përmes një deklarate, pas samitit të zhvilluar në Shkup, ku morën pjesë ish –Presidentët e Kroacisë Stipe Mesiq, i Kosovës Fatmir Sejdiu, i Shqipërisë Alfred Mojsiu, i Maqedonisë Branko Crvenkovski dhe ish udhëheqës tjerë të rajonit, theksohet se “ ne anëtarët e Klubit të Podgoricës shprehim gatishmërinë tonë që të bëjmë gjithçka që të parandalojmë që Ballkani Perëndimor përsëri të jetë viktimë e ideve dhe trendeve retrograde”.

Në lidhje me situatën në Kosovë, Bosnje e Serbi, ata theksojnë se idetë retrograde të ndarjeve që shkojnë kundër bashkëpunimit rajonal e që nxisin izolacionizëm, politikën e kthimit prapa dhe që bazohen në popullizëm në vend se të bazohen në vlerat e përbashkëta dhe standardet europiane, për fat të keq, nuk janë vetëm kujtime të largëta historike, por përbëjnë një kërcënim serioz për Ballkanin Perëndimor.

Në vijim i kërkohet BE të aprovojë datën e fillimit të negociatave për anëtarësim të Shqipërisë dhe Maqedonisë së Veriut në BE.

“Shtyrja e mëtejme e këtyre vendimeve në kontekstin e tashmë gjeopolitik dhe gjeoekonomik mund të ketë ndikim të dëmshëm edhe në nivel të brendshëm edhe në atë rajonal. Jemi dëshmitarë të sfidave të rendit global që bazohet në vlerat e përbashkëta dhe demokratike të shoqërive dhe mundësinë që ato të kenë ndikim negativ në Ballkanin Perëndimor”, thuhet në deklaratë.