Zbulimi i përdhunimit të një vajze vetëm 8 vjeçe në Durrës ka përfshirë në skandal policinë dhe prokurorinë e qytetit bregdetar.

Pasi e kanë fshehur për 2 javë këtë ngjarje makabre, policia dhe prokuroria tani kanë nisur kërcënimet ndaj medias që publikoi rastin.

Pasi policia fillimisht tha se e ka bërë publike në komunikatë, prokuroria e Durrësit shkon edhe më tutje, duke kërcënuar këdo që nxjerr informacione.

‘Rasti ka të bëjë me persona të mitur të përfshirë në këtë ngjarje dhe për këto arsye bazuar në parashikimet e Kodit të Drejtësisë Penale për të Mitur ju bëjmë me dije se është i ndaluar çdo lloj publikimi lidhur me rastin’, thotë prokuroria.

Në fakt media nuk ka nxjerrë as detaje e as të dhëna, por ka zbuluar një skandal të madh, ku një vajzë 8-vjeçare edhe tani pas 2 javësh është e pambrojtur pikërisht nga memecëria e pushtetit dhe drejtësisë.

Njoftimi për media nga prokuroria pranë Gjykatës së Shkallës së Parë Durrës

Sipas informacionit që u administrua nga Prokuroria pranë Gjykatës së Shkallës së Parë Durrës, lidhur me rastin që është përhapur në media që ka të bëj me një ngjarje të ndodhur ne Arapaj Durrës, ju informojmë se:

Është regjistruar çështja penale Nr.1288 që bën fjalë për veprën penale të parashikuar nga nenet 108/a dhe 110/2 të Kodit Penal.

Nuk janë të sakta njoftimet e përhapura në media lidhur me këtë çështje, sipas akteve të administruara nuk ka ndodhur dhe nuk është tentuar të kryhet vepra penale e “Marrëdhënieve  seksuale me të mitur”.

Rasti ka të bëjë me persona të mitur të përfshirë në këtë ngjarje dhe për këto arsye bazuar në parashikimet e Kodit të Drejtësisë Penale për të Mitur ju bëjmë me dije se është i ndaluar çdo lloj publikimi lidhur me rastin.

Do të kërkojmë mirëkuptimin tuaj për mospublikimin e rastit si arsye e parashikimeve të ketij Kodi.

Duke ju falënderuar për vëmendjen!