Qytetarët nga Shqipëria të strehuar në Prizren pas tërmetit të 26 nëntorit po kthehen në mënyrë vullnetare në shtëpitë e tyre. Rreth 70 persona kanë lënë kampet në dy ditët e fundit, ndërsa 450 të tjerë përllogaritet se janë ende aty.

Mbi 70 persona, kryesisht të komunitetit rom dhe egjiptian kanë lënë në mënyrë vullnetare kampin e Inovacionit dhe sallën e përshtatur të gjimnazit Gjon Buzuku ku ishin strehuar. “Po ikim për Durrës me gjithë bashkëshorten time”, tha një qytetar, raporton Ora News.

Procesi i rikthimit në zonat ku jetonin e banonin para tërmetit, po bëhet në mënyrë të organizuar me autobusë të cilët shoqërohen nga efektivë të Policisë së Kosovës.

Aktualisht në kampin e Inovacionit në Prizren janë strehuar 420 banorë nga disa zona të prekura nga tërmeti, ndërsa 30 të tjerë janë akomoduar në palestrën e Gjimnazit Gjon Buzuku.

Qytetarët vlerësojnë pritjen dhe kushtet që u siguruan autoritet e Kosovës “Ne po ikim me dëshirën tonë. Faleminderit shumë popullit të Kosovës. Na kanë respektuar me të ngrënë, me të veshur, me të gjitha gjërat. Unë kam qenë te kampi gjerman dhe kanë qenë të gjitha kushtet”, tha një qytetar tjetër.

Shqiptarët e strehuar në Prizren pas tërmetit u vizituan edhe nga presidenti Ilir Meta. Kryeministri i Shqipërisë, Edi Rama sot kërkuar që të strehuarit në Kosovë të kthehen në Shqipëri.

Rama ka deleguar ministren e Arsimit, Besa Shahini dhe atë të Shëndetësisë dhe Mbrojtjes Sociale, Ogerta Manastirliu që të vijnë në Kosovë dhe të bindin njerëzit të kthehen dhe të akodmohen në hotele. Shefi i ekzekutivit tha se në Kosovë janë strehuar 783 persona.

Rama tha se situata po paraqitet më pozitive në raport me nevojat imediate dhe se ajo po shkon drejt përmirësimit.