Policia dhe Prokuroria e Durrësit prezantuan, në një konferencë të posaçme për median, listën e personave të arrestuar, në vijim të hetimeve mbi shkatërrimin e disa ndërtesave pas tërmetit të 26 Nëntorit në qytetin bregdetar.

Në deklaratën zyrtare, institucionet informuar publikuan se, deri mesditën e së Shtunës, ishin zbatuar 9 nga 17 urdhër-ndalimet e lëshuar nga Prokuroria e qytetit bregdetar mbrëmjen e së Premtes.

Në listën emërore janë ish-zyrtarë lokalë dhe disa përfaqësues të subjekteve private ndërtuese. Bie në sy se lista ka edhe disa emra, të cilët kanë lidhje të forta me Partinë Socialiste në pushtet.

Një prej tyre është Arben Isaku, ish-drejtor i ALUZNI-t, në Durrës, një nga figurat kryesore të Partisë Socialiste në qytet. Ai ka mbajtur prej shumë kohësh postin e Sekretarit Organizativ të Degës së Partisë Socialiste në qytet.

Isaku u arrestua edhe në Gusht të vitit 2019, në një hetim të zhvilluar nga Prokuroria e Durrësit, për dhënien e lejeve të legalizimit. Isaku iu shmang drejtësisë për disa ditë. Më pas, ai u vetëdorëzua dhe gjykata vendosi që ta hetonte atë në gjendje të lirë.
Tashmë, ai përfundon sërish në pranga, si i dyshuar për veprën penale të “Shpërdorimit të detyrës” për shkak të legalizimit të disa objekteve të rrëzuara gjatë tërmetit të 26 Nëntorit.

Një tjetër person me lidhje të forta politike është Ahmet Doda, drejtor i Kavalishencës së Ministrisë së Brendshme në Durrës, ku mbeti i vdekur zyrtari i lartë policor Bajram Hajdarmetaj.

Sekretari i Përgjithshëm i Lëvizjes Socialiste për Integrim, Endri Braimllari, deklaroi i pari se Doda është djali i dalës së Taulant Ballës, numrit dy të Partisë Socialiste.

“Boldnews.al” verifikoi në mënyrë të pavarur këto të dhëna dhe rezultoi e vërtetë që i ndaluari Ahmet Doda, i lindur në Lunik të Librazhdit, është kushëri i parë i Sekretarit të Përgjithshëm të Partisë Socialiste, Taulant Balla.