Në një lidhje direkte për emisionin "Opinion" kryetari i PD, Lulzim Basha përsëriti edhe një herë apelin e tij për sa më shumë testime si mënyra më e mirë për të penguar përhapjen e mëtejshme të Koronavirusit në vend.

"Nëse vazhdojmë të kemi testimet më të ulta në Europë, si mund të izolojmë pa testuar? Do të zgjasë karantina, izolimi, shëndetësia do të shkojë drejt kolapsit. Nuk mund të kemi më pak testime se Maqedonia e Veriut. Ndërkohë që situata atje percepitoi pas Shqipërisë. Sot po bëjmë 4 testime për 1 të infektuar, ndërkohë që mesataja është 12. Nëse nuk e bëjmë na rroftë izolimi dhe distancimi social. Ta dimë edhe ne ku i kemi të infektuarit", u shpreh Basha.

Sipas kreut të PD, sa kohë bëhet fjalë për jetë njerëzish, refuzoj ti përgjigjem retorikave politike, duke i bërë thirrje kryeministrit Edi Rama të heqë dorë nga kjo sjellje.

"I kërkoj kryeministrit të mos e harxhoj kohën me debat politik, as me retorikë dhe as me sulme. Jemi 2 herë mbrapa Maqedonisë së Veriut me testime. Një vend me 2 të tretat e popullsisë sonë ka 2 herë më shumë testime”, shtoi lideri i opozitës.

Shqipëria deri tani, zyrtarisht ka 377 raste të infektuarisht me Koronavirus dhe 22 viktima. Një ndër zonat më të nxehta për momentin është Shkodra, me rastet që rriten dita-ditës.