Të paktën dy infermierë në Kukës rezultojnë se janë prekur nga koronavirusi i ri. Një ditë më parë u raportua se një infermier i urgjencës së qytetit është prekur nga Covid-19.
Ai mendohet se e ka marrë infeksionin teksa kujdesej për një paciente nga Hasi, që ishte prekur nga koronavirusi.
Infermieri ka infektuar edhe familjen e tij, duke hapur një vatër të rrezikshme në Kukës.
Pyetja që lind është se përse bluzat e bardha po lihen të pambrojtura përballë këtij rreziku?
Po ashtu, përse këta mjekë dhe infermierë në mbarë vendin nuk po konsiderohen sikur janë në vijën e parë të zjarrit, kur po e marrin edhe ata infeksionin e rrezikshëm?
Përse nuk u përgatitën mjekët dhe infermierët në mbarë vendin që të përballeshin me rrezikun që në fillim, por vetëm tani ministria flet për tonelata me ndihma në pajisje mbrojtëse për mjekët?
Po ashtu, përse nuk ka asnjë premtim për një ndihmë financiare edhe për bluzat e bardha që po përballen me rrezikun kudo, jo vetëm te Infektivi dhe Sanatoriumi?