Drama "Këngë dashurie me korba" shkruar nga Bashkim Hoxha me regji nga Laert Vasili pas skenës së teatrit rikthehet për publikun në amfiteatrin e liqenit. Vetë regjisori Vasili lajmëron se në datën 9 qershor shfaqja do të jetë në skenën e hapur te kodrat e liqenit. Për publikun vjen një histori dashurie, që i ngjan më shumë një kënge. Shfaqja vjen si një teatër muzikor i gërshetuar me atë fizik nga artistët. Prania e 4 instrumentistëve live, që ndërveprojnë me aktorët dhe publikun shton ngjyrat e spektaklit dhe këngët interpretohen live në shfaqje. Skenografia dhe kostumet Joni Peçi, aktorë në vepër Laert Vasili, Arjola Basho, Jaho Guma, Artemisa Kusi dhe Josif Sina. Muzika live nga Jetmir Alku, Yllnor Kurti, Roni Kapllani dhe Fisnik Kurti. Në qendër të veprës është Marini, ku papritur i shfaqet gruaja nga përtej e cila vjen dhe i tregon se çfarë ka ndodhur me të kohë më parë, si dhe braktisja që i bëri ai kur kjo ishte vetëm 16 vjeç. Regjisor dhe aktor në dramë Laert Vasili pohon se në veprën e autorit Bashkim Hoxha ka pasur liri për të ndërhyrë në përshtatje për në skenë. Vepra “Këngë dashurie me korba” ka marrë çmimin “Aleksandër Moisu” më 1997. Autori Bashkim Hoxha ka krijuar disa vepra të njohura. Nga pena e tij janë një radhë veprash si: "Lakuriq", "Ground Zero", "Dëshmitari i Shkretëtirës", "Hotel Ballkan", "Mbreti i Vesës", "Mot i keq për dashuri", "Njeriu tjetër", "Një lolo dhe një mbret", etj