Në shenjë homazhi për viktimat nga shembja e urës në Gjenova në Itali.

Arthur Rimbaud

Urat

Qiej gri të kristaltë. Një vizatim i çuditshëm urash, këto këtu të drejta, ato atje të kërcyera, të tjera që zbresin apo shtrembërohen në kënde mbi të parat, dhe këto figura që përtërihen në rrathë të tjerë të ndriçuar të kanalit, por të gjitha po aq të gjata e të lehta sa brigjet, të ngarkuara me kupola, ulen e mpaken. Disa prej këtyre urave janë ende të ngarkuara me shpartallina. Të tjera mbajnë direkë, sinjale, parmakë të brishtë. Disa akorde të vogla kryqëzohen e tirren, penj u ngjiten brigjeve. Dallon një xhaketë të kuqe, mbase kostume të tjera dhe instrumente muzike. A janë melodi popullore, funde koncertesh fisnikësh, mbetje himnesh publike? Uji është gri e blu, i gjerë si një gji deti. – Një rreze e bardhë, e rënë nga kupa e qiellit, zhduk nga faqja e dheut këtë komedi.

Përktheu : Anila Xhekaliu

"Lyons" Joseph Mallord William Turner 1775–1851