Artistja 85 vjeçare japoneze Yoko Ono është një prej pjesëmarrëseve në Sallonin e Tetorit këtë vit në Beograd. Ajo që njihet edhe si Bienalja e Beogradit, Oktobarski Sallon është një prej ngjarjeve më kryesore të artit në Ballkan, ku marrin pjesë vit për vit rreth 50 artistë nga mbarë bota, për të ekspozuar por edhe për të fituar çmimin e përvitshëm.

Yoko Ono është vetëm njëra prej pjesëmarrëseve. Artistja e njohur, dikur gruaja e John Lennon, është e famshme për paraqitjet e saj artistike dhe performancat në gjuhën angleze dhe japoneze.  Një punë që vlen të përmendet është ajo e vitit 1964, e titulluar “Cut Piece”.

Në këtë edicion të Sallonit të Tetorit, që do të nisë sonte në mbrëmje, do të marrin pjesë edhe artistë të tjerë, mes tyre Jasmina Cibic, Maja Dordevic, Ian Cheng, Takashi Murakami, Cindy Sherman e artistë të tjerë.

“Kakofonia e mrekullueshme” është tema e këtij edicioni, i cili do të jetë i hapur deri me 28 tetor.