Vetëm pak ditë pasi u emërua anëtar i Akademisë Franceze të Arteve të Bukura, RTV Ora ka intervistuar baletmaestron Preljocaj gjatë qëndrimit të tij në Romë ku përgatiti vënien në skenën e Teatrit të Operas, baletin e tij "Borëbardha". Koreografi i mirënjohur shprehet i lumtur për vlerësimin dhe rrëfen se së shpejti do të vijë me projekte edhe në Shqipëri.

Vetëm pak ditë pasi u emërua anëtar i Akademisë Franceze të Arteve të Bukura në Paris, koreografi i sukseshëm shqiptaro-francez Angelin Preljocaj, ka rrëfyër për RTV Ora se ndihet i nderuar dhe i lumtur që për herë të parë një shqiptar bëhet pjesë e Akademisë franceze.

Prejlocaj ndodhet në Romë, ku po përgatit vënien në skenën e Teatrit të Operas, baletin e tij "Borëbardha".

Angelin Prejljocaj: Unë jam i nderuar për këtë vlerësim që kam marrë si dhe jam shumë i lumtur që ky lajm është pritur mjaft mirë dhe në Shqipëri që është vendi i zemrës time. Jam i kënaqur për këtë vlerësim për dy arsye. E para është se baleti për herë të parë u fut, pra u bë pjesë e Akdemisë Franceze të Arteve të Bukura. Piktura, skulptura, arkitektura, fotografia, kinematografia ishin pjesë e kësaj Akademie, ndërsa baleti nuk ekzistonte, kështu që kënaqësia ime e parë ishte kjo. Së dyti jam i nderuar e mjaft i kënaqur që jam anëtar i kësaj Akademie të rëndësishme. Si dhe jam gjithashtu i lumtur që për herë të parë një shqiptar bëhet pjesë e Akademisë Franceze e kur shoh se ky lajm është vërtetë një krenari për shqiptarët, kjo gjë më prek në zemër.

Preljocaj rrëfen se së shpejti vjen në Shqipëri me një projekt në Teatrin e Operas e Baletit të Tiranës.

Angelin Preljocaj: Po kam një projekt së shpejti me Shqipërinë. Disa balerinë të Teatrit të Operas e Baletit të Tiranës do të mikpriten në rezidencën e kompanisë time të baletit në Aix en Provence. Ata do të përgatiten për baletin tim "Annociation" që më pas do të shfaqet në skenën Teatrit të Operas së Tiranës.

Koreografi Preljocaj kthehet në Teatrin e Romës pas dy vitesh me një vepër të rëndësishme klasike "Borëbardha".

Ai ndan disa elementë të koreografisë së tij që shquhet për modernizmin e autenticitetin.

Angelin Preljocaj: Borëbardha ime është një Borëbardhë moderne, shumë muzikore nën ritmin e muzikës së Gustav Mahler, është e tmerrshme e mizore siç eshtë përmbajtja e saj e në të njëjtën kohë mjaft e bukur dhe emocionuese në lëvizje siç janë dhe personazhet e saj kryesorë Borëbardha e Princi që vjen dhe e zgjon, pra do të jetë një përrallë e vërtetë.

I nominuar nga Presidenti francez Emmanuel Macron, Angelin Preljocaj është shqiptari i parë që bëhet anëtar i Akademisë franceze, vlerësim ky që vjen 20 vite pas titullit të marr më 1998 si Kavalier i Legjonit të Nderit të Republikës Franceze.