Presidenti serb Aleksandar Vuçiç njoftoi se Serbia po përforcon ushtrinë me pajisje të reja, ndër to helikopterë dhe tanke luftarake nga Rusia dhe drone nga Kina.

I pranishëm në një stërvitje ushtarake të madhe, me rastin e 100-vjetorit të përfundimit të Luftës së Dytë Botërore, ku morën pjesë 8 mijë ushtarë, 100 tanke luftarake dhe avionë luftarakë MiG-29 të blerë nga Rusia, presidenti Vuçiç foli për një përforcim dramatik të ushtrisë serbe, duke shtuar se në rajon ndoshta vetëm Rumania mund të krahasohet me Serbinë në këtë pikë.

Kjo stërvitje vjen në një klimë të pafavorshme për mbarëvajtjen e Dialogut mes Kosovës dhe Serbisë, mes kërcënimeve serbe kundër planeve të Kosovës për t’i shndërruar Forcat e Sigurisë së Kosovës në Ushtri të saj. Gjithashtu, Serbia ka intesifikuar përpjekjet, presionin dhe lobimin ndaj vendeve që kanë njohur Kosovën, me qëllim tërheqjen e njohjeve. Ndërkohë betejën për bllokimin e anëtarësimit të Kosovës në organizatat ndërkombëtare Serbia aktualisht e ka përqendruar tek Asambleja e Përgjithshme e Interpolit, që do të mbahet javën e ardhshme në Dubai. Në këto kushte, sipas Washington Post, kjo stërvitje shihet edhe si skërmitje kërcënuese ndaj Kosovës.