Qëndresa Sadriu është shqiptarja e parë që është zgjedhur si deputete në Parlamentin e Kantonit të Zyrihut. Në një prononcim ekskluziv për “albinfo.ch” thotë se ndihet krenare që është shqiptarja e parë e zgjedhur në Parlamentin e Kantonit të Zyrihut.

Ajo theksoi se është befasuar me rezultatin, pasi ajo ka garuar me politikanë shumë të njohur zviceranë nga ky kanton.

Ndër të tjera, Qëndresa shprehet se kjo është një fitore jo vetëm për shqiptarët, por edhe për të si femër e re.

“Këtë datë nuk do ta harroj kurrë edhe për shkakun se lidhet me përvjetorin e sulmeve te NATO-s mbi forcat serbe në Kosovë”, deklaroi Qëndresa Sadriu.

Partia Socialdemokrate, si pjesë e së cilës ka garuar ajo, kësaj here ka marrë më shumë vende. “Dhe kjo do të thotë se do të kemi mundësi të jetësojmë më shpejt ligjet e nevojshme në parlament”, shprehet optimiste Qëndresa.

Ajo falënderoi të gjithë votuesit shqiptarë dhe të tjerë që e kanë mbështetur në zgjedhjet kantonale.

Qëndresa, ka kryer zanatin (Lehre) si asistente dentale, pastaj ka mbaruar edhe maturën ndërsa këtë vit fillon studimet për shkencat sociale në PH (Shkollën e Lartë Pedagogjike) në Cyrih, e po ashtu në shtator të këtij viti, ajo fillon praktikën në shoqatën humanitare, “Sozialwerke Pfarrer Sieber”.

Opfikon është pjesë e Qarkut të Bülach-ut, si dhe një nga 166 komunat e Kantonit të Zürichut, ndërsa ka mbi 15 mijë banorë.