Presidenti i Kosovës, Hashim Thaçi ka përkujtuar masakrën e Burgut të Dubravës, e cila shënon 19 vjetorin e saj. Masakra e Burgut të Dubravës është kryer prej 19 deri më 24 maj të vitit 1999. Kjo masakër njihet si një ndër më të mëdha në Kosovë kundër shqiptarëve, nga regjimi i Sllobodan Milloseviçit ku u vranë 160 persona dhe u plagosën më shumë se 300 të tjerë. Një pllakë përkujtimore me emrat e të gjithë atyre që janë vrarë në këtë masakër gjendet brenda burgut të Dubravës

 “Në përvjetorin e masakrës në Burgun e Dubravës i kujtojmë të gjithë të burgosurit shqiptarë që përjetuan jo vetëm persekutime sistematike, por edhe vrasje mizore nga forcat policore serbe”, ka thënë Thaci.“Duke pasur informacione se ky burg do të sulmohej prej forcave veri-atlantike, autoritetet serbe ato ditë kishin ekstraduar shumë të burgosur shqiptarë në këtë burg, për t’i vrarë dhe për t’ua veshur fajin forcave të NATO-s”.“Masakra e Dubravës është një prej tragjedive më të mëdha, autorët e së cilës ende nuk dolën para drejtësisë”- është shprehur Thaçi.

Gjithashtu me rastin e përkujtimit të kësaj dite sot behën homazhe në nderim të burgosurve të vrarë nga ushtria serbe.