Teksa janë vendosur në ‘skanerin’ e Operacionit të Forcës së Ligjit për hetimin e pasurive të tyre, 3 të ‘fortëve’, personazhe të njohura, iu janë sekuestruar makinat.

Burime zyrtare nga policia bënë me dije se në vijim të Operacionit Forca e Ligjit, në zbatim të ligjit special për masat pasurore ndaj individëve të dënuar apo akuzuar për krim të organizuar, Drejtori i Përgjithshëm i Policisë së Shtetit, Ardi Veliu në bazë të nenit 19 të Aktit Normativ nr. 1, datë 31.01.2020, nxori urdhrat e sekuestrimit në kushtet e emergjencës për disa automjete të blinduara, të cilat u sekuestruan gjatë operacionit.

“BalkanWeb” mëson se bëhet fjalë për automjetet e Saimir Taullaut, banues në Lushnjë, i dënuar për veprën penale “Prodhimi dhe shitja e narkotikëve”;
Dashamir Gjoka, banues në Durrës, i dënuar në Itali për trafik të qenieve njerëzore;
Durim Bamit, banues në Krujë, i dënuar për veprën penale “Vjedhja me armë”.

Operacioni vijon dhe OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.