Nga Kastriot Dervishi

Në dokumentacionin e viteve 1939-1943, do të gjesh plot “antifashistë” të 1944-s. Me poste zyrtare, me përfitime materiale, etj, pikërisht në kohën kur kampet e fashizmit mbusheshin me antifashistë antikomunistë. Sepse komunistët i urrejnë jashtëzakonisht antifashistët antikomunistë. Nuk i durojnë dot. Se këta "antifashistët" që u bënë komunistë, vetëm fundin e luftës kanë "heroik". Le të shohim rastin që sjell sot.  

Me vendimin nr.873, datë 21.5.1940, Këshilli i Ministrave vendosi që pjesëmarrës në grushtin e dështuar të shtetit të vitit 1935, t’i paguheshin rrogat përkatëse nga Ministria e Financave. Personi më i njohur në këtë vendim është Zylyftar Veleshnja (Çela). Në kohën e grushtit të shtetit, ky ishte ngarkuar nga organizata të kryente disa atentate kundër drejtuesve të shtetit. siç edhe dihet, regjimi fashist i kishte shumë për zemër këta që kishin kryer kësi punësh. Nuk mund t’i linte Zylyftari pa marrë rrogat e regjimit fashist. Sigurisht me atë kredencial i plotësonte të gjitha kushtet. Në vitin 1945 Zylyftari dha shumë dënime me vdekje në Berat, duke çuar në plumb gjithë parinë e asaj prefekture, duke i akuzuar si fashistë. Në vitin 1949 Zylyftarit iu dha titulli “Hero i Popullit”. Sot emrin e tij e mbajnë rrugë e shkolla si “antifashist” i madh.