Nga Kastriot Dervishi

Në 100-vjetorin e nisjes së jetës së Tiranës si kryeqytet i Shqipërisë, munguan ceremonitë në vendet historike. Mania për koncerte, për shfaqje, portrete pa lidhje me qytetin dhe deklaratat kontradiktore deri qesharake të kryetarit të bashkisë, ishin gjërat që u mbajtën më tepër mend në përvjetorin e rrallë. Në ceremonitë përkujtimore, të mbizotëruara më së shumti nga elemti i palexuar, tejet injorant, munguan ceremonitë për vendet ku u vendosën dy institucionet në Tiranë, Këshilli i Ministrave dhe Këshilli i Naltë. Në vendin ku ka qenë qeveria e parë dhe MPB-ja, ka një pllakë, ndërsa vendi ku ka qenë kryetari i parë i shtetit, nuk ka asnjë lloj shenje. Në Tiranë do të gjesh me qindra e mijëra pllaka me yje të kuq që tregojnë mbi aksionet e “qarkorit të partisë” për ndonjë top me letër apo këpucë, por kurrsesi, një shenjë që lidhet me fillimin e jetës politike në Tiranë. në sheshin para Kuvendit të Shqipërisë, gjendet edhe një pllakë për gjasme vendin ku ka qenë qeveria e Fan Nolit (që është përcaktim i gënjeshtërt), por kurrsesi një emërtim të vendeve kë kanë qenë institucionet e shtetit. Edhe në Durrës është i njëjti defekt, aty ku ka qenë pallati mbretëror i Wiedit nuk ka asnjë shenjë.

Në shkurt 1920, Këshilli i Naltë që kryente rolin e kryetarit të shtetit u vendos në këtë godinë që shihet në foto. Ky vend është sot pak a shumë aty ku ndodhet busti i Sabri Godos. Pas mbarimit të epokës së Këshillit të Naltë, në vitet 1925-1928 këtu ishte selia e kryetarit të Republikës Shqiptare, Ahmet Zogu. Edhe pas shpalljes së Shqipëri mbretëri, pallati vijoi të ishte i kryetarit të shtetit. Besohet se rreth vitit 1929, mbreti u zhvendos në selinë ku është sot Akademia e Shkencave. Rreth kësaj kohe, pallati në fjalë është shembur dhe vendi i bë lulishte.