Nga Kastriot Dervishi
Më 13 shtator 2020, “veteranët” dhe autoritetet vendore festuan “çlirimin” e Beratit nga pushtuesit nazistë. Mirëpo shikoni sesi lëviz për këtë ngjarje jo vetëm data, por edhe të dhënat nga viti në vit. Midis viteve 1944-1972, janë vrarë edhe 347 gjermanë të tjerë. Ndërsa po midis këtyre viteve janë “ngjallur” 20 partizanë. Sigurisht njihet fakti se ushtria gjermane po tërhiqej nga gjithë Ballkani dhe nuk do qëndronte vetëm në Berat. Por sipas terminologjisë komuniste, edhe largimet quhet “çlirime” sepse nevojiteshin data për agjitacionin monumental.
-Në historikun e Brigadës së 7-të thuhet se Berati është çliruar më 12 shtator 1944 dhe armiku la 53 të vrarë dhe 70 plagosur. Nga partizanët u vranë 3 dhe u plagosën 13. Nuk jepet asnjë e dhënë për numrin e gjermanëve këtu. (AQSH/AP, F.183, V.1944, D.24, fleta 4)
-Në librin “Kronikë e ditëve të stuhishme”, Tiranë 1972, botim i Drejtorisë Politike të Ushtrisë Popullore, Tiranë 1972 (botimi i dytë), faqe 331-333, thuhet se qyteti u çlirua më 12 shtator 1944 nga batalione të Brigadës së 7-të. Armiku pati këto dëme: 400 të vrarë, 300 robër “dhe mjaft të plagosur”. Nga partizanët u vranë 23 dhe u plagosën 38. Në këtë botim thuhet se në Berat ishin 600 gjermanë.
