Nga Kastriot Dervishi

Te godinat e ministrive (përfshi atë të bashkisë sepse godinë ministrie ka qenë) në Tiranë, gjenden të vendosura 4 pllakate që bëjnë fjalë për aksione të njësiteve guerile në vitet 1942-1943. Ato lidhen me rrëmbimet e shaptilografëve e gjëra të tjera të këtij lloji. Asnjë godinë ministrie nuk ka të shënuar vitin e ndërtimit dhe funksionet. E çuditshme është se nuk gjendet asnjë aksion që t’i përkasë periudhës së pushtimit gjerman. Për të kompensuar këtë, një “aksion” të bërë në Ministrinë e Arsimit (sot Ministria e Financave) e kanë paraqitur me datë të falsifikuar. Ngjarja i takon gushtit 1943, ndërsa pllaka ka të shënuar atë 14.10.1943. Aq ishte shkrehur shteti atëherë, saqë në mes të Tiranës, u morën nga Ministria e Arsimit 7 makina me materiale e veshmbathje të destinuar për shkollat. Ngjarja gjendjet e përshkruar në ditarin e Haki Stërmillit, në shënimin e datë 6.9.1943. Siç e përshkruan Stërmilli, aksioni dështoi sepse në vend që të merrte këpucë burrash, mori grash.

Kujtimet e Haki Stërmillit (që gjenden në AQSH)

Këtu ndeshën një djalosh e cili quhesh Xhemal Driza, ishte tiranas që kishte ardhur nga Tirana. Priste disa shokë prej Tirane dhe mandej së bashku do të shkonin në çetën e Dajtit. Ai na tha se këto ditë, në bashkëpunim me disa shokë dhe bazën e partisë, kishte tërheqë nga depot e Ministrisë së Arsimit disa mijë palë këpucë. Aksionin e paskan krye natën, me kamionë. Italianët dhe veglat e tyre qenkan shqetësuar mjaft nga kjo humbje. Por ai s’ishte i kënaqur për shkak se këpucët paskan qenë për gra e jo për burra, sikurse kishte pandehë dhe i kishte raportuar partisë për me marrë autorizim.