Pas takimit ndërmjet Presidentit të SHBA-ve, Donald Trump dhe atij të Rusisë, Vladimir Putin, është mbajtur një konferencë për shtyp ku të dy presidentët kanë treguar se çfarë u bisedua në takim.

Në fund të konferencës për shtyp, Putin, si mikpritës i Kampionatit Botëror, i ka dhuruar Trumpit një top të futbllit.

Pasi një gazetar i bëri një pyetje në konferencën e përbashkët për shtyp të hënën në Helsinki duke përdorur metaforat e futbollit, Putini nxori një top dhe ia dhuroi Trump-it.

Trump tha se do t'ia jepte djalit të tij 12-vjeçar Barron, një tifoz i futbollit. Pastaj presidenti i SHBA hodhi topin te gruaja e tij Melania, e ulur në rreshtin e parë.

Por dhurata e Putinit për Trump nuk kaloi pa teoritë konspirative të ngritura në media.

Senatori republikan Lindsey Graham, një kritik i Putinit, shkroi: "Po të isha unë, do ta kontrolloja topin e futbollit për pajisjet përgjuese dhe nuk do ta lejoj kurrë atë në Shtëpinë e Bardhë".