Ministri për Brexit në Mbretërinë e Bashkuar, Dominic Raab, tha se pritet një marrëveshje me Bashkimin Europian, ndërkohë që do të takojë liderët europian në Salzburg javën e ardhshme.

Britania pritet të dalë nga blloku në 29 Mars 2019, por nuk ka arritur ende në një dakordësi me Brukselin për marrëdhënien që dy vendet do të kenë dhe disa rebelë në partinë Konservatore të Kryeministres Theresa May, kanë kërcënuar se nuk do ta votojnë marrëveshjen nëse nuk ndryshon propozimet e saj.
Londra dhe Brukseli presin që marrëveshja të arrihet në mes të Nëntorit. May  ka thënë se samiti informal i BE në javën që vjen do të jetë një pikë kritike në negociata, pasi do t’i japë mundësinë liderëve europianë që të diskutojnë për planet e saj të Brexit për të parën herë.
“Ndërsa qëndrojnë ende ndasi të mëdha që duhet të zgjidhen mes dy palëve,  kushtet po ngushtohen drejt një zgjidhjeje për marrëveshjen e daljes nga Europa”, tha Raab pas një telefonate me negociatorin europian për Brexit, Michel Barnier.
Barnier tha në Twitter se ai ka zhvilluar një dialog të rëndësishëm me ministrin britanik, por shtoi se ka ende ndasi mes vendeve për çështjen e kufirit me Irlandën.