Organizatat që kryejnë lobizëm për të huajt, po i bëjnë gjithnjë e më shumë të ditura aktivitetet e tyre, ndërsa Departamenti amerikan i Drejtësisë po forcon zbatimin e një ligji pak të njohur, sikurse është Akti i Regjistrimit të Agjentëve të Huaj (FARA).

Ligji kërkon që profesionistët e marrëdhënieve me publikun, firmat ligjore dhe të tjerë të cilët punojnë në emër të qeverive të huaja në Shtetet e Bashkuara, të regjistrohen pranë Departamentit të Drejtësisë. Shumë lobistë e kanë injoruar këtë kërkesë të ligjit, si pasojë e zbatimit dhe mbikqyrjes së dobët të tij.

Pajtimi vullnetar me ligjin u bë i dukshëm në vitin 2016, kur dolën në dritë përpjekjet lobuese të ish-kryetarit të fushatës presidenciale të zotit Trump, Paul Manafort, për politikanët ukrainas.

Regjistrimet e lobistëve u shtuan më tej pasi ndaj zotit Paul Manafort-i dhe ish-partnerit të tij të biznesit Rick Gates, u ngritën padi, tetorin e kaluar, për një numër akuzash, përfshirë shkeljen e këtij ligji.

Të dhënat e Departamentit të Drejtësisë tregojnë një rritje të numrit të atyre që janë regjistruar që nga fundi i vitit 2016.