Kryeministri japonez Shinzo Abe, një përkrahës i linjës së ashpër ndaj Koresë së Veriut, thotë se është i gatshëm të takohet me udhëheqësin e Phenianit Kim Jong Un.

Zoti Abe i bëri komentet e përpara Asamblesë së Përgjithshme të Kombeve të Bashkuara të martën. Ai tha tha se çdo takim i nivelit të lartë do t'i kushtohej zgjidhjes së një mosmarrëveshjeje të vjetër që lidhet me rrëmbimet e civilëve japonezë nga Koreja e Veriut.

"Nga ky vend, në të njëjtën periudhë të vitit të kaluar, i kërkova me forcë Koresë së Veriut që të zgjidhë çështjen e rrëmbimeve, atë të programit bërthamor dhe raketave. Si dikush që bën apel për zbatimin e plotë të të gjitha rezolutave të rëndësishme të Këshillit të Sigurimit të OKB-së, i kushtoj vëmendje të madhe ndryshimeve në Korenë e Veriut. Pheniani ndodhet aktualisht në një udhëkryq dhe ose do ta shfrytëzojë, ose do të dështojë ta kapë mundësinë historike që i është ofruar", tha ai.

Zoti Abe tha se ende nuk ka plane për një takim ndërsa i bëri thirrje udhëheqësit të Phenianit të tregojë interesin e tij për një takim mes tyre.

Ndërkohë nuk kanë munguar spekulimet rreth një takimi Abe-Kim. Sipas njoftimeve udhëheqësi i Phenianit i ka thënë Presidentit amerikan Donald Trump gjatë takimit të tyre në qershor në Singapor, se ishte i gatshëm të fliste me armikun e tij japonez.

Të mërkurën pritet që zoti Abe të takohet me Presidentin Trump për të diskutuar shqetësimin japonez rreth fërkimeve në rritje mes dy vendeve për çështje të tregtisë.