Komisioni Europian në një komunikatë për shtyp të lëshuar ditën e martë, tha se mënyra e arrestimit dhe dëbimit të 6 shtetasve turq nga Kosova, hedh dyshime mbi mbajtjen e një proçesi të rregullt gjyqësor ndaj tyre në Turqi.

Zëdhënësja e KE-së, Maja Koçijançiç ka nënvizuar se sundimi i ligjit është një parim themelor për Bashkimin Europian, ndaj dhe veprimet e institucioneve të Kosovës duhet të jenë në përputhje me normat e përcaktuara në Marrëveshjen e Stabilizim-Asocimit.

Koçijançiç pohoi se veprimet arbitrare bien ndesh me normat e sanksionuara në këtë marrëveshje.

“Komisioni Europian njeh të drejtën e Turqisë për të gjykuar personat e dyshuar për grushtin e shtetit të para dy viteve, por duhen garantuar të drejtat themelore për këdo”, thuhet në deklaratë.