Komisioni për Politikat e Jashtme në Parlamentin Europian ka publikuar raportin mbi Shqipërinë, të cilin ia ka adresuar Këshillit të Ministrave të Bashkimit Europian që do të vendosë më 28 qershor nëse do hapen negociatat.

Në dokumentin e hartuar nga raportuesi për vendin tonë, Knut Fleckenstein flitet për 35 pika, ku kërkohet çelja e negociatave pa kushte për Shqipërinë, pasi ka përmbushur 5 prioritetet kyçe.

Megjithatë, komisioni ka edhe disa rezerva; kështu sa i takon Reformës në Drejtësi, në raport thuhet se Shqipëria duhet të bëjë më tepër në konsolidimin e reformës, pasi implementimi i plotë do të rikthente besimin e qytetarëve tek sundimi i ligjit dhe do të rriste luftën ndaj krimit të organizuar dhe korrupsionit.

Për Reformën Zgjedhore shkruhet se Këshilli Europian kërkon nga palët politike që ta miratojnë me konsensus para zgjedhjeve lokale të vitit 2019 pasi kjo do të shmangte shit-blerjen e votës, regjistrimin e votuesve dhe problemet me administrimin e procesit.

Po ashtu u bëhet thirrje autoriteteve shqiptare të sigurojnë zbatimin e efektshëm të të drejtave pronësore. Një tjetër shqetësim është se Shqipëria mbetet vendi më i madh në Ballkanin Perëndimorë sa i takon numrin të azilkërkuesve në vendet e Bashkimit Europian, kërkesa të cilat konsiderohen si të pabazuara në realitet.

Në raport vlerësohet edhe toleranca fetare dhe u bëhet apel institucioneve që të luftojnë elementët që nxisin urrejtjen.

Deri tani, disa vende evropiane si: Franca, Holanda, Danimarka dhe Gjermania kanë shprehur rezerva sa i takon progresit të Shqipërisë duke mos dhënë garanci se do të votojnë pro hapjes së negociatave. /politiko.com/